الاسرة

قصة مولد وطفولة النبي مناسب للاطفال عمرو خالد

قصة مولد وطفولة النبي عمرو خالد

قصة مولد وطفولة النبي .. دروس في تربية الأطفال

قصة مولد وطفولة النبي .. دروس رائعة في تربية الأطفالالحلقة رقم ٣ #نبي_الرحمة_والتسامح#رؤية_جديدة#رمضان

Gepostet von Amr Khaled am Montag, 29. Mai 2017

النهاردة حنبدأ معاكوا اول حلقة من السيرة النبوية للاطفال ولو حابين تتابعوا باقي السلسلة تابعونا علي صفحة اطفال و لكن حتنزل اسبوعيا

تتميز السلسلة بشكل مبسط و سهل باللهجة المصرية العامية وذلك تيسيرا على الآباء و الأمهات فلن تحتاج لأن تحاول تبسيط الكلمات و إختصار الأحداث بما يتناسب مع عمر طفلك و قدرة إستيعابه.

السلسة عبارة عن 28 حلقة احكوها لأطفالكم كل يوم حلقة يعنى فى خلال شهر هايكون طفلك على علم بسيرة النبى الحبيب محمد صلى الله عليه وسلم.

الحلقة 1

بسم الله

كان ياما كان …. و ما يحلي الكلام غير بذكر النبي عليه الصلاة و السلام …
الولاد الحلوين يقولوا إيه ؟ 
………… عليه الصلاة و السلام …. ممتازين !

مين يا أولاد أحسن واحد في الدنيا ؟ …. سيدنا محمد
سيدنا محمد … هو اللي ربنا اختاره عشان يعلمنا الصح و الغلط ….و الحلال و الحرام .
ربنا اختار سيدنا محمد عشان يعلمنا الأعمال الطيبة و الأخلاق الجميلة .
و يعلمنا دينا الإسلام ….

واللي هيحب سيدنا محمد و يسمع الكلام اللي ربنا علمه لسيدنا محمد … ربنا هيحبه
…. و هيدخله الجنة .
و الجنة دي أحلي مكان …
اللي فيه كل حاجة و أي حاجة احنا عاوزينها … ومهما فكرنا في الجنة…. الجنة برضه هتبقي أحلي من تفكيرنا !!!!

كان زمان زماااان …….. سيدنا ابراهيم بيبني الكعبة و معاه ابنه اسماعيل …. سيدنا إبراهيم و هو بيبني الكعبة ….. و قف يدعي ربنا … إنه يبعت للناس ….واحد … رسول ….يعلمهم الصح و الغلط و الحلال و الحرام …… عشان يخليهم ناس كويسين و طيبين و بيعملوا الخير ….. فربنا أستجاب الدعاء …و اختار سيدنا محمد ….إنه يكون المعلم … …. اللي يعلم كل الناس أوامر ربنا .

أبو سيدنا محمد ……كان اسمه ايه ؟ ……….. عبد الله ابن عبد المطلب ( لازم الطفل يردد )
و مامته كان اسمها ايه …………….. آمنة بنت وهب …….(خليه يقول وراكي )

سيدنا محمد لما كان لسه جوة بطن مامته ….. باباه عبد الله مات …… و مكنش شافه لأنه مكنش لسه أتولد ……….. عارفين سيدنا محمد أتولد إمتي؟؟ …. أتولد عام الفيل ….( يعني في نفس السنة اللي أبرهة الشرير كان عايز يهدم الكعبة بالفيل الضخم … بس ربنا عاقبه و كل الجنود الأشرار اللي كانوا معاه … و مقدرش يكسر الكعبة )…..

أول لما مامته (آمنة بنت وهب ) ولدته ندهت علي جده ……. أبو باباه …. اسمه عبد المطلب …….شافه ….لقاه طفل شكله جميل أوي ….. فمامة سيدنا محمد قالت لجده … أنا أما كنت بنام كنت بحلم حلم جميل أوي …كنت بشوف نور بيخرج من جسمي … و بينور الدنيا كلها ….

فجده فرح أوي و حس إن الطفل ده هيبقي مش طفل عادي …و انه لما يكبر هيعلم الدنيا كلها و هيخلي الناس تشوف الحاجات الصح زي النور اللي بيخلينا نشوف كل حاجة في حياتنا .

جده قال …. أنا هسميه محمد !!!! ….. فالناس سألته : يعني إيه محمد ؟؟؟ ….
قالهم يعني ربنا في السماء يحبه و يحب أخلاقه الجميله … و الناس في الأرض تحبه و تحب أخلاقه الجميلة .

بس سيدنا محمد مش هيفضل مع أهله ،،، وهيسيب مامته وجده ،،،
يا تري مين اللي هياخده ؟

نكمل الحلقة الجاية ،، 
السلسلة حتنزل علي الهاشتاج ده #السيرة_النبوية_اطفال_ولكن
بقلم
د. رشا رشاد

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق